Iskrabol

Una, random ang mga letra:

walang kaayos-ayos, payak

na magulo. Tapos, pikit-matang

pipili ang ating mga kamay.

Maghahanap ng kaayusan --

o kahit isang salita man lang --

na nagtatago sa isang sulok,

naghihintay na pakawalan

ng mga letrang pikit-matang pinili.

Mauuna kang titira. Ito

ang pinakamadaling sundan:

walang hirap ang paghahanap

ng pagsisingitan ng salita. Tapos,

ikaw ulit, tapos, ako, at walang

tigil hanggang maubos na

ang nasa lalagyan. Susubukan kong

huwag magpahiya -- lalo na't

nakilala mo ako bilang magaling

sa mga salita -- pero wala

akong makita sa mga letra

kundi ang iyong pangalan. Kahit na

walang "C" sa mga nakahilera

sa aking harapan. Kahit na

ang lahat ng nabubunot ko

ay walang kinalaman sa atin.

Kahit na gulo-gulo ang mga letrang

random din, katulad ng mga salitang

itinutulak ng mga daliri natin

sa kung saan-saan. Hindi kita matalo-

matalo. Masuwerte ka't ang daling

gawan ng salita ang iyong nakukuha,

kaysa naman sa akin, na kung saan

nakatatatak ng iyong mukha.

kay Cindy